ajab ik vaqt gulshan men ye paigham-e-bahar aaya
faza hi sazgar aa.i na mausam sazgar aaya
suna.un kya main apni dastan-e-gham tujhe hamdam
vo aaya apni mahfil men magar begana-var aaya
tabassum ne kisi ke ruuh phunki gulsitanon men
shagufon ko javani ka yaqin-o-e’tibar aaya
usi ko log kahte hain surur-o-kaif ka aalam
surahi ḳhatm ho jaane pe halka sa ḳhumar aaya
ajab ik mahviyat thi log divana samajhte the
tire kuche men kuchh din is tarah main bhi guzar aaya
karo ai ham-safiro ehtimam-e-jashn-e-azadi
ḳhizan ruḳhsat hui lo jhuum kar abr-e-bahar aaya
‘nazar’ ne ḳhud bhi dekha hai jamal-e-yar ka aalam
jo un ke ru-ba-ru pahuncha vahi kuchh be-qarar aaya
Leave a Reply