mai-kashi ki sharab ki baten
tauba tauba janab ki baten
main ne kab pi hisab se yarab
mujh se phir kyon hisab ki baten
tu ghafur-ur-rahim hai be-shak
phir ye kaisi azaab ki baten
airon-ghairon se ham nahin karte
dil-e-ḳhana-ḳharab ki baten
kitna khul khul ke log karte hain
sharmsari hijab ki baten
dil-nashin dil-fareb hoti hain
dekho bhaunre gulab ki baten
gul-o-ghuncha bhi jal ke karte hain
us ke husn-o-shabab ki baten
us ka chehra kitab jaisa hai
paḌhiye paḌhiye kitab ki baten
raat tanha hai ham bhi tanha hain
chhoḌo bhi ye hijab ki baten
yaar makr-o-fareb lagti hain
aj-kal inqalab ki baten
kya qayamat ‘suhaib’ aa pahunchi
tere munh se savab ki baten
Leave a Reply