Maqam-E-Hosh Se Guzra Makan Se La-Makan Pahuncha

Poet

maqam-e-hosh se guzra makan se la-makan pahuncha

tumhare ishq men divana-e-manzil kahan pahuncha

nazar ki manzilon men bas tumhin husn-e-mujassam the

mata-e-arzu le kar main ulfat men jahan pahuncha

usi ne ishq ban kar do-jahan ko phunk Daala hai

vo sho.ala jo tiri nazron se dil ke darmiyan pahuncha

junun zahir hua ruḳh par ḳhudi par be-ḳhudi chha.i

ba-qaid-e-hosh main jab bhi qarib-e-astan pahuncha

tum apni justuju men ye mira shauq-e-talab dekho

tumhare ishq men luT kar bhi tum tak jan-e-jan pahuncha

ta.alluq toḌ kar jan-e-jahan saare zamane se

main pahuncha tha jahan mujh ko tiri ḳhatir vahan pahuncha

‘fana’ vo jalva-gar hone lage har bazm-e-iman men

mira dil le ke jab mujh ko sar-e-ku-e-butan pahuncha