hamari is vafa par bhi dagha ki
qasam khaa.i thi o kafir ḳhuda ki
vo musht-e-ustuḳhvan huun ai sag-e-yar
agar khaa.e sa.adat hai huma ki
lab-e-shirin ka jo bosa liya tha
miri us ki shakar-ranji raha ki
vafa se main ne bhi ab haath uThaya
qasam hai mujh ko apne bevafa ki
hui gar sulh bhi to bhi rahe jang
mila jab dil to aankh us se laḌa ki
faqiron ke qadam lete hain sultan
ye hai tasir naqsh-e-boriya ki
tasavvur bandh gaya jab us mizha ka
to pahron dil pe barchhi si laga ki
ḳhuda yuun jis ko chahe de sa.adat
vagarna sag men ḳhaslat hai huma ki
nahin uThta hai sar sajde se mera
magar hai sajda-gah us ḳhak-e-pa ki
kahun jab main ki be tere huun marta
to kahta hai vo but marzi ḳhuda ki
na aaya minnaton se yaar jis dam
to phir kya kya ajal ke iltija ki
Leave a Reply