dariya men Duub jaave ki ya chaah men pade
ai ishq par na koi tiri raah men pade
mat puchh jaur-e-gham se dil-e-na-tavan ka haal
bijli to dekhi hogi kabhi kaah men pade
ik dam bhi dekh sakta nahin ham ko us ke paas
khaak us falak ke dida-e-bad-khvah men pade
jo dosti ke naam se rakhta ho dushmani
divana ho jo us ki koi chaah men pade
aa ja kahin shitab ki manind-e-naqsh-e-pa
takte hain raah teri sar-e-rah men pade
jalve do-chand hoven shab-e-mah ke abhi
us mah-ru ka aks agar maah men pade
sulge hai nim-sokhta jaise dhuen ke saath
jalte hain yuun ham apni ‘hasan’ aah men pade