sajida-zaidi

Kab Se Mahw-E-Safar Ho

sajida! kin yugon ki masafat samete hue

is bayaban men yunhi bhatakti rahogi

in bagulon ke hamrah yuun raqs karti rahogi

kitne sahraon men tum ne phode hain paanv ke chhale

kitni bedar raton se manga hai tum ne khiraj-e-tamanna

sajida! kuchh kaho

hijr ke kin zamanon men ashkon ki maala piroi

kin hisabon chukaya qarz-e-junun

kaun se marhalon se guzar kar bana ruuh ka pairahan

kis tarah jaan se guzre hain tufan-e-gham

kis tarah tund andhi ki yalghar men

tum ne apni rida ko sambhala

kaise yakh-basta tanhaiyon men

jashn-e-ruh o dil o jaan manaya

shola-e-arzu men

kaise harf o nava ko tapaya

jagti raat ki tirgi ko

kis tarah mutla-e-nur-e-yazdan banaya

kitne sajdon se apni jabin ko sajaya

sajida!

dard ke raston par

kab se mahv-e-safar ho

tum ne in regzaron ki banjar zamin men

kitne raftar o guftar ke gul khilae

is uqubat-kada ki siyahi men

kitne charagh-e-tamanna jalae

sajida!

is tag-o-dau se tum ne

kya kabhi chehra-e-zindagi ko sanvara

kya kisi dil men koi sitara utara

kya zamane ki raftar badli

kya kisi tapte sahra ke zarron ko kundan banaya

kitne zakhmon pe insan ke marham lagaya

zulm ki dastan ko kabhi harf-e-shirin banaya

sajida!

shaam hai zindagi ki

thak ke so jaao sab hao-hu bhuul jaao

kadi dhuup ke kos dar kos

agle zamanon ke naqsh-e-qadam hain

rang mausam badalne laga hai

tum masiha nahin

thak ke so jaao

raqs-e-junun bhuul jaao

More Poems

Leave a Comment