Saleem Shahid
harf-e-be-matlab ki main ne kis qadar tafsir ki
shakl pahchani ga.i phir bhi na is tasvir ki
sub.h ka darvaza khulte hi chalo gulshan ki samt
rang uḌ ja.ega phulon ka agar taḳhir ki
qaid mere jism ke andar koi vahshi na ho
saans leta huun to aati hai sada zanjir ki
tere chehre par jo likkha tha miri ankhon men hai
hifz hai mujh ko ibarat ab bhi us tahrir ki
tujh ko dekha bhi nahin lekin teri ḳhvahish bhi hai
ret ki divar sat.h-e-ab par ta.amir ki
ghar ki virani dar-o-divar ke andar rahi
main ne apne dard ko mohlat na di tash.hir ki
main ne lauh-e-arsh par likkha hua sab paḌh liya
la miri ankhon men miTTi de miri taqdir ki
mehr-o-mah lagte hain apne jism ke zarre mujhe
sochta huun kaun si manzil hai ye tasḳhir ki
luT chuke vo haath shahid jin se mangi thi dua
haan abhi tak hai fazaon men mahak tasir ki
Leave a Reply