Niyaz Husain Lakhwera
tan-e-nahif ki ḳhatir rida nahin mangi
bahut dinon se ḳhuda se dua nahin mangi
ḳhud apni laash ko apne lahu se Dhanpa hai
hari ruton se gulon ki qaba nahin mangi
chhaton pe pyaas paḌav kiye rahi lekin
siyah-baḳht gharon ne ghaTa nahin mangi
koi shajar na ḳharida ḳhulus-e-jan ke evaz
shadid dhuup men ThanDi hava nahin mangi
sukut-e-marg labon ko pasand hai itna
jo musta.ar mile vo sada nahin mangi
nuzul-e-mausam-e-tahqir-e-jan se bachne ki
gulab aise badan ne dua nahin mangi
Leave a Reply