ye ankhon hi ankhon men kya ho ga.e ham
abhi jagte the abhi so ga.e ham
maqam-e-tajassus ik aisa bhi aaya
ki paaya tujhe aur ḳhud kho ga.e ham
tire gham ko ḳhud se bhi ham ne chhupaya
magar phir bhi rusva-e-gham ho ga.e ham
jo ab tak the zeb-e-qaba-e-mohabbat
kuchh aise bhi moti kabhi ro ga.e ham
anasir ne liin hichkiyan saans ukhḌi
kaha ishq ne javedan ho ga.e ham
ye me.araj-e-dard-e-mohabbat hai shayad
ki teri nazar men bhi gham bo ga.e ham
taḌapne men ‘altaf’ vo lazzaten thiin
ki taḌpe na ji bhar ke aur so ga.e ham
Leave a Reply