Khumar Mirzada
ham ki the ḳhush-fahm din ki be-panahi dekh kar
haath malte rah ga.e shab ki siyahi dekh kar
kaun daman dekhta hai kaun sunta hai dalil
jurm sabit ho raha hai be-gunahi dekh kar
ham na kahte the dinon men ik hamara din bhi hai
din badalte hain hamari dad-ḳhvahi dekh kar
dilbari se ḳhud-parasti ne rakha na-ashna
rukte rukte ruk ga.e ham kam-nigahi dekh kar
harf-e-be-ma.ani se behtar hai nava-e-be-sada
ro paḌa main vaqt ki viran-nigahi dekh kar
ḳhaak par likkhe ga.e ham ḳhaak par rakkhe ga.e
lahlaha.e sabzagi ki ḳhush-giyahi dekh kar
dil-nashin hai ghuncha-e-nau-vaqt lekin kab talak
dil lahu hai shaḳh-e-gul ki kaj-kulahi dekh kar
kitne aise dard hain jin ki dava chahi ga.i
sochta huun zaḳhm-e-dil ki bar-gahi dekh kar
dida-e-sailab-ju ki dasht-paira.i ḳhumar
alam-e-ḳhashak ki dekhi tabahi dekh kar
Leave a Reply