Nae Ghamze Nae Andaz Nazar Aate Hain

nae ghamze nae andaz nazar aate hain

din-ba-din husn ke eajaz nazar aate hain

vo shahid-e-nigah-e-naz nazar aate hain

aj-kal aur hi andaz nazar aate hain

sar jhukae hue chalta huun tire kuche men

kyunki sar-baz hi sar-baz nazar aate hain

bahut unche na ude hain na udenge gesu

ye kabutar to girah-baz nazar aate hain

jhuut khud bolna ulta mujhe jhuta kahna

sach hai dam-bazon ko dam-baz nazar aate hain

bhej to di hai ghazal dekhiye khush hon ki na hon

kuchh khatakte hoe alfaz nazar aate hain

ghamza-o-naz-o-ada mehr-o-vafa jaur-o-jafa

sab ke sab khana-bar-andaz nazar aate hain

lutf aae jo shab-e-vasl moazzin so jaae

kyunki vo gosh-bar-avaz nazar aate hain

umar guzri hamin sarkar pe marte marte

jaan dete hain to jan-baz nazar aate hain

bulbulon se nahin gulzar-e-zamana khali

shukr hai yaan bhi ham-avaz nazar aate hain

bad-gumani bhi mohabbat ka nishan hai ‘parvin’

ghalati ho to ho naraz nazar aate hain