aajiz tha be-ijz nibha.i rasm-e-juda.i main ne bhi
us ne mujh se haath chhuḌaya jaan chhuḌa.i main ne bhi
jangal ke jal jaane ka afsos hai lekin kya karna
us ne mere par gira.e aag laga.i main ne bhi
us ne apne bikhre ghar ko phir se sameTa Thiik kiya
apne bam-o-dar pe baiThi gard uḌaa.i main ne bhi
nauha-garan-e-yar men yaron mera naam bhi likh dena
us ke saath bahut din ki hai naghma-sara.i main ne bhi
ek diya to marqad par bhi jalta hai ‘asim’ aḳhir
duniya aas pe qaa.em thi so aas laga.i main ne bhi
Leave a Reply