lafz chunte hue tartib na.i lagti hai
dil dukhane ki ye tarkib na.i lagti hai
meri tahsin se kiya aap ne danista gurez
kyuun qaside men ye tashbib na.i lagti hai
ab haqiqat ki tarah is ko bhi taslim karen
zindagi ki koi tadib na.i lagti hai
kuchh na.e ḳhvab na.i ḳhvahishen daman men liye
har na.e saal ki targhib na.i lagti hai
un ki baton pe siyasat ka asar hai goya
un ki har baat men takzib na.i lagti hai
vaqt ke saath badal Daale hain adab-e-vafa
aap ke ishq ki tahzib na.i lagti hai
Leave a Reply