shamil tha ye sitam bhi kisi ke nisab men
titli mili hanut purani kitab men
dekhunga kis tarah se kisi ko azaab men
sab ke gunah daal de mere hisab men
phir bevafa ko bahr-e-mohabbat samajh liya
phir dil ki naav duub gai hai sarab men
pahle gulab us men dikhai diya mujhe
ab vo mujhe dikhai diya hai gulab men
vo rang-e-atshin vo dahakta hua shabab
chehre ne jaise aag laga di naqab men
barish ne apna aks kahin dekhna na ho
kyuun aaine ubharne lage hain habab men
gardish ki teziyon ne use nuur kar diya
mitti chamak rahi hai yahi aftab men
us sang-dil ko main ne pukara to tha ‘adim’
apni sada hi laut kar aai javab men
Leave a Reply