Salam Machhli Shahri
gham par hain ta.ana-zan to ḳhushi bhi nibha.iye
sarkar meri bada-kashi bhi nibha.iye
moti se ashk aap ke qadmon ko the aziiz
sukhe hue labon ki hansi bhi nibha.iye
pahle to mauj-e-gul thi mire har ḳhayal men
ab fikr ki ye sho.ala-ravi bhi nibha.iye
ye kya ki aap sirf parastish karen qubul
ma.abud-e-shahr meri ḳhudi bhi nibha.iye
be-shak huzur saqi-e-bazm-e-bahar hain
lekin ḳhud apni tishna-labi bhi nibha.iye
haan in hasin a.ankhon men raqsan hai zindagi
palkon ki ho sake to nami bhi nibha.iye
shahzad-gan-e-mumlikat-e-husn ke tufail
ham sha.iron ki kaj-kulahi bhi nibha.iye
Leave a Reply