Mushtaq Anjum
naav TuuTi hui biphra hua dariya dekha
ahl-e-himmat ne magar phir bhi kinara dekha
garche har chiiz yahan ham ne buri hi dekhi
phir bhi kahna paḌa jo dekha so achchha dekha
diip se diip jalane ki hui rasm tamam
ham ne insan ka insan se jalna dekha
jab se bachche ne khilaune se bahalna chhoḌa
das baras men hi use tiis ke sin ka dekha
ra.ij-ul-vaqt hain bazar men khoTe sikke
jo khare hain unhen hote hue rusva dekha
hosh men a.enge arbab-e-vatan kab ‘anjum’
main ne har-gam pe kashmir ka ḳhitta dekha
Leave a Reply