Javed Shaheen
is tarah karte hain kuchh log baḌa.i us ki
ḳhalq us ki hai ḳhuda us ka ḳhuda.i us ki
kya ḳhabar thi ki yahin vasl ke saa.e ke qarib
dhuup ke beach paḌi hogi juda.i us ki
le ga.e shauq se marhum ki har shai ahbab
chhoḌ di taaq ke uupar hi achchha.i us ki
ki hai iflas men doshiza-e-ummid javan
ab to bas baiTh ke khani hai kama.i us ki
zindagi kaTti hai donon ki musalsal zid men
qaid hai meri vahi jo hai riha.i us ki
mo’atabar naam tha vo phir bhi havala na diya
jaan bachane ko qasam jhuTi na khaa.i us ki
zindagi saari ganva duun ye zaruri to nahin
ye bahut hai ki koi baat nibha.i us ki
ye mohabbat nahin kuchh aur hai surat ‘shahin’
tum maza le ke jo sunte ho bura.i us ki
Leave a Reply