kyon na rangin ho dastan meri
zikr un ka hai aur zaban meri
husn apni shikast maan gaya
afrin sa.i-e-ra.egan meri
saikḌon hashr ke barabar hai
ik tamanna hai jan-nashin meri
uḌ gaya rang un ke aariz ka
lab tak aa.i na thi fughan meri
kyon suna.un kisi ko main aḳhir
un ka qissa hai dastan meri
vo sama.e hue hain rag rag men
har ada ab hai dilsitan meri
rah-e-dushvar ḳhud sabaq degi
na sunen ahl-e-karvan meri
har kali gulsitan nazar aati
qadar karta jo baghban meri
vajd taari hai ahl-e-dil pe ‘bashir’
hasil-e-ishq hai azaan meri
Leave a Reply