Kyon Na Rangin Ho Dastan Meri

kyoñ na rangīñ ho dāstāñ merī

zikr un kā hai aur zabāñ merī

husn apnī shikast maan gayā

āfrīñ sa.ī-e-rā.egāñ merī

saikḌoñ hashr ke barābar hai

ik tamannā hai jāñ-nashīñ merī

uḌ gayā rang un ke aariz kā

lab tak aa.ī na thī fuġhāñ merī

kyoñ sunā.ūñ kisī ko maiñ āḳhir

un kā qissa hai dāstāñ merī

vo samā.e hue haiñ rag rag meñ

har adā ab hai dilsitāñ merī

rāh-e-dushvār ḳhud sabaq degī

na suneñ ahl-e-kārvāñ merī

har kalī gulsitāñ nazar aatī

qadar kartā jo bāġhbāñ merī

vajd taarī hai ahl-e-dil pe ‘bashīr’

hāsil-e-ishq hai azaañ merī

Leave a Comment