mahr sadiyon se chamakta hi raha aflak par
raat hi taari rahi insan ke idrak par
aql ke maidan men zulmat ka dera hi raha
dil men tariki dimaghon men andhera hi raha
ik na ik mazhab ki sai-e-kham bhi hoti rahi
ahl-e-dil par barish-e-ilham bhi hoti rahi
asmanon se farishte bhi utarte hi rahe
nek bande bhi khuda ka kaam karte hi rahe
ibn-e-maryam bhi uthe musi-e-imran bhi uthe
raam o gautam bhi uthe firaun o haman bhi uthe
ahl-e-saif uthte rahe ahl-e-kitab aate rahe
iin janab uthte aur an-janab aate rahe
hukmaran dil par rahe sadiyon talak asnam bhi
abr-e-rahmat ban ke chhaya dahr par islam bhi
masjidon men maulvi khutbe sunate hi rahe
mandiron men barhaman ashlok gaate hi rahe
aadmi minnat-kash-e-arbab-e-irfan hi raha
dard-e-insani magar mahrum-e-darman hi raha
ik na ik dar par jabin-e-shauq ghisti hi rahi
adamiyyat zulm ki chakki men pasti hi rahi
rahbari jaari rahi paighambari jaari rahi
diin ke parde men jang-e-zargari jaari rahi
ahl-e-batin ilm se sinon ko garmate rahe
jahl ke tarik saae haath phailate rahe
ye musalsal afaten ye yorish ye qatl-e-am
aadmi kab tak rahe auham-e-batil ka ghulam
zehan-e-insani ne ab auham ke zulmat men
zindagi ki sakht tufani andheri raat men
kuchh nahin to kam se kam khvab-e-sahar dekha to hai
jis taraf dekha na tha ab tak udhar dekha to hai