bazm-e-janan men mohabbat ka asar dekhenge
kis se milti hai nazar un ki nazar dekhenge
ab na palkon pe Tiko TuuT ke barso ashko
un ka kahna hai ki ham dida-e-tar dekhenge
dhaḌkano tez chalo Dubti nabzo ubhro
aaj vo bujhte charaghon ki sahar dekhenge
ai mire dil ke sulagte hue dagho bhaḌko
hijr ki raat vo jalta hua ghar dekhenge
tere dar se hamen ḳhairat mile ya na mile
ham tire dar ke siva koi na dar dekhenge
mai-kade jumenge barsegi javani ki sharab
vo chhalakti hui nazron se jidhar dekhenge
un ki nazron se hai vabasta zamane ki nazar
vo jidhar dekhenge sab log udhar dekhenge
aaj maazi ke fasane vo sunenge ai ‘charḳh’
meri barbad umidon ke khanDar dekhenge
Leave a Reply