baiTha tha tan ko Dhank ke jo garm shaal se
mushkil men paḌ gaya vo sitaron ki chaal se
ḳhamoshiyon ki raah pe ho kar ke gamzan
rakhna kabhi na soch ka rishta malal se
ummid aisi un se matanat ki thi nahin
bachche bigaḌ ga.e hain bahut dekh bhaal se
dam-ḳham to kuchh nahin tha haqiqat ke naam par
ghabra gaya jahan hamari majal se
kuchh maslahat ke naam pe chup chaap ham rahe
vaqif the varna vaqt ke poshida haal se
chadar pe asman ki bikhri thi chandni
arasta zamin thi is ke jamal se
tum shahr ja rahe ho to jaao magar vahan
arman milenge dekhna behad niDhal se
afsurda fikr thi jo qadamat ke ḳhol men
shadab ho ga.i hai vo raushan ḳhayal se
ik patte ki bisat tumhari hai ‘sahni’
miTTi men ja miloge juda ho ke Daal se
Leave a Reply