sona tha jitna ahd-e-javani men so liye
ab dhuup sar pe aa ga.i hai aankh kholiye
yaad aa gaya jo apna gareban bahar men
daman se munh lapeT liya aur ro liye
ab aur kya karen tire tark-e-sitam ke ba.ad
ḳhud apne dil men aap hi nashtar chubho liye
parvana-e-riha.i-e-ḳhama to mil gaya
lekin huzur ab dar-e-zindan bhi kholiye
apne liye ta.ayyun-e-manzil koi nahin
jo bhiiḌ jis taraf ko chali saath ho liye
thi nagavar-e-tab.a tujhe sadgi-e-ishq
le aaj ham ne palkon men moti piro liye
har ik ba-zom-e-ḳhvesh jahan ho suḳhan-shanas
behtar ye hai ‘saba’ ki vahan kuchh na boliye
Leave a Reply