munh pherta nahin hai kisi kaam se badan
bikhra paḌa hai aaj magar shaam se badan
bhula nahin hai ab bhi tira lams-e-aḳhiri
lo phir sihar uTha hai tire naam se badan
muddat men jis tarah koi bichhḌa hua mile
aise lipaT gaya hai dar-o-bam se badan
chhilke to buund buund mire jism par gire
chipka liya hai main ne tire jaam se badan
thoḌa to chalne phirne de mujh ko mire hakim
thak sa gaya hai roz ke aram se badan
Leave a Reply