khidki andhi ho chuki hai
dhuul ki chadar men apna munh chhupae
kaali sadken so chuki hain
dhuup ki nangi chudelon ke sulagte qahqahon se
ja-ba-ja pedon ke saae jal rahe hain
mez par gul-dan men hanste hue phulon se
mithe lams ki ḳhushbu ka jharna bah raha hai
ek saaya aine ke kaan men kuchh kah raha hai
ahd-e-rafta ki gilahri
ḳhub-surat dum uthae
roti ke tukde ko danton men dabae bhagti hai
ek makdi
maghribi kone men jaala bun rahi hai
shahr ḳhali ho raha hai
kya tum apni zindagi se mutmain ho?
haan… nahin huun
ḳhair jaane do… suno
masjid ka vo budha moazzin
ḳhair ki janib bulata hai tumhen
apna gham kis se kahen