Shakeel Badayuni
aankh un ko dekhti hai nazara kiye baghair
parde men chhup gae hain vo parda kiye baghair
har-chand dard-e-ishq ka darman nahin magar
banti nahin hai fikr-e-mudava kiye baghair
zahid se puchhiye gham-e-duniya ki azmaten
uqba na mil saki gham-e-duniya kiye baghair
jaate hain dil men chhod ke vo jalva-e-khayal
bujhti hai shama ghar men andhera kiye baghair
aksar to dil giraftagi-e-shauq ki qasam
mujh tak vo aa gae hain irada kiye baghair
ham ko bhi dekhna hai ki ye munkarin-e-ishq
kab tak rahenge teri tamanna kiye baghair
sher-o-adab ki raah men hai gamzan ‘shakil’
apne mukhalifin ki parva kiye baghair
Leave a Reply