chashm-e-hasin men hai na ruḳh-e-fitna-gar men hai
duniya ka har fareb fareb-e-nazar men hai
ab kya ḳhabar ki dil men hai kya kya jigar men hai
ab to tiri nazar ka tamasha nazar men hai
iman rakh ke kya karun farsuda chiiz hai
masti mujhe qubul ki teri nazar men hai
nasur dard-e-zaḳhm tapish soz-o-iztirab
saman sau tarah ka dil-e-muḳhtasar men hai
hazir hai us ke vaste jis ko ho aarzu
haan ik lahu ki buund miri chashm-e-tar men hai
qismat se mil ga.i hai ye bedari-e-hayat
is ishq ke nisar ki duniya nazar men hai
mujh ko na din ko chain na shab ko sukun nasib
ik rabt-e-da.imi miri sham-o-sahar men hai
hairat se dekhiye na mire sajda-ha-e-shauq
ye astan kuchh aur hi meri nazar men hai
baaqi hain ba.ad-e-tauba bhi rindi ke valvale
dil men ḳhayal-e-bada hai saghar nazar men hai
achchhi mili hai mujh ko ye divangi-e-shauq
duniya ka har ḳhayal dil-e-be-ḳhabar men hai
do qatra-ha-e-ḳhun sar-e-mizhgan hain muntazir
‘bahzad’ do-jahan ka tamasha nazar men hai
Leave a Reply