mita diya mire saaqi ne alam-e-man-o-tu
pila ke mujh ko mai-e-la-ilaha-illa-hu
na mai na sher na saaqi na shor-e-chang-o-rabab
sukut-e-koh o lab-e-ju va lala-e-khud-ru
gada-e-mai-kada ki shan-e-be-niyazi dekh
pahunch ke chashma-e-haivan pe todta hai subu
mira sabucha ghanimat hai is zamane men
ki khanqah men khali hain sufiyon ke kadu
main nau-niyaz huun mujh se hijab hi aula
ki dil se badh ke hai meri nigah be-qabu
agarche bahr ki maujon men hai maqam is ka
safa-e-paki-e-tinat se hai guhar ka vazu
jamil-tar hain gul o laala faiz se is ke
nigah-e-shair-e-rangin-nava men hai jaadu
Leave a Reply