Qafas Pe Barq Gire Aur Chaman Ko Aag Lage

Ram Awtar Gupta Muztar

qafas pe barq gire aur chaman ko aag lage

ilahi gardish-e-charḳh-e-kuhan ko aag lage

sulag rahi hain mire dil ki hasraten aise

bhari bahar men jaise chaman ko aag lage

har ek qatra-e-shabnam bana hai angara

ajab nahin jo gul-e-yasman ko aag lage

na ponchh ashk mire dekh apne daman se

ḳhuda kare na tire pairahan ko aag lage

qasam hai ham ko tiri chashm-e-mast ki saaqi

piyen sharab to kam-o-dahan ko aag lage

nasib hon na jahan ta.eron ko do tinke

ḳhuda kare ki ab aise chaman ko aag lage