uTh ga.i aaj chand ki Doli
kitni viran hai raat ki jholi
apna saaya sameT kar rakhna
mujh se ik bhagti kiran boli
ab to jaag ai shabon ki shahzadi
tujh ko sona tha umr-bhar so li
saans roko charagh gul kar do
aaj badlegi chandni choli
main huun sathi sulagte sahra ka
tu ThiThurti kiran ki ham-joli
ek dariya sambhal sambhal ke chala
ek kashti qadam qadam Doli
asman tu abhi zamin pe na aa
main ne muTThi abhi nahin kholi
kab talak koi dil pe kaan dhare
kaun samjhe ‘rashid’ ki boli
Leave a Reply