Meri Turbat Par Chadhane Dhundta Hai Kis Ke Phul

meri turbat par chadhane DhunDta hai kis ke phuul

teri ankhon ka huun kushta rakh de do nargis ke phuul

ek din ho jaunga tere gale ka haar main

sunghne ko mat liya kar haath men jis tis ke phuul

bistar-e-gul par jo tu ne karvaten liin raat ko

itr-agin ho gae ai gul-badan sab pis ke phuul

vasl-e-mahvash ka dila muzhda hamen de hai charagh

jhadte hain har dam shab-e-hijran men munh se is ke phuul

kuchh khabar bhi hai tujhe chal fatiha ke vaste

aaj hain ai shokh tere ashiq-e-muflis ke phuul

aur hi kuchh rang hai siine ke daghon ka mire

is ravish ke hain kahan tere sipar par mis ke phuul

tu hai vo jo mahr-o-mah sham-o-sahar tujh par se vaar

sim-o-zar ke phenkte hain biich men majlis ke phuul

kya nava-sanji karen ai ham-safiran-e-chaman

aa gai fasl-e-khizan gulshan se saare khiske phuul

hain mah o khurshid jo shaam o sahar tujh par se vaar

siim o zar ke phenkte hain biich men majlis ke phuul

kis ne sikhlai hai tujh ko ye ravish raftar ki

mit gae qalin ke jo tere qadam se ghis ke phuul

phuljhadi se kam nahin mizhgan-e-ashk-afshan tiri

motiya ke dekhna jhadte hain munh se is ke phuul

rang-e-khub-o-zisht men kyuun farq samjhe hai ‘nasir’

khaar bhi tu hai usi ka hain banae jis ke phuul

Leave a Comment