ye kaisi aya-e-mo.ajiz-numa nikal aa.i
hava-e-dasht se bad-e-saba nikal aa.i
bichha hua tha nigahon men farsh-e-istisqa
zamin-e-dil pe nabi ki dua nikal aa.i
koi disha nazar aati nahin thi ta-ba-falak
zamin se ta-ba-falak ik disha nikal aa.i
pahaḌ ho ga.i tanha.i, aur phir ik roz
usi pahaḌ se ghar-e-hira nikal aa.i
gini-chuni hui ghaḌiyon men ek sa.at-e-sabz
kanar-e-dahr se bhi mavara nikal aa.i
Leave a Reply