ek divar jo haael hai miri sochon men
kitne pechida savalon se mujhe rokti hai
jab bhi main rakht-e-safar bandhti huun shane par
apni jadu-bhari hasti se mujhe tokti hai
ye jo divar ki rahti hai siyah khanon men
din dhale apne tilismat ko dikhlati hai
mujh ko mahsur kiye rakhti hai angaron men
chaar janib rukh-r-anvar se bahlati hai
aisa lagta hai ki taron se damakti hui raat
ik zara jumbish-e-mizhgan se bhi bujh jaegi
meri sochon ke tasalsul ko ye biphri nagin
ek hi aan men afsos nigal jaegi
subh hote hi ye divar-e-siyah khanon men
ret ke dher ki manind utar jaegi
raat ki jadugari khvab si ban jaegi
shama-danon men faqat raakh hi rah jaegi
ik naya din miri viran guzargahon par
le ke kashkol mire saath utar aaega
mere daman se lipat kar ye samay ka rela
mujh ko mujh se hi juda karne pe uksaega
”ek divar jo haael hai mari sochon men”
Leave a Reply