Syed Ahmed Shameem
dilon men koi havas koi aarzu bhi nahin
main sab luTa chuka ab fikr-e-abru bhi nahin
zaman-makan se guzar kar huun alam-e-hu men
safar tamam hua shauq-e-justuju bhi nahin
tire ḳhayal ki sar-mastiyan dimagh men hain
ye vo nasha hai ki minnat-kash-e-subu bhi nahin
vo band ankhon men rah rah ke jagmagata hai
namaz-e-ishq men pabandi-e-vuzu bhi nahin
lahu badan men jo hota to kuchh Tapakta bhi
dahan-e-zaḳhm ko ab hajat-e-rafu bhi nahin
‘shamim’ le ke kahan aa.i zindagi mujh ko
ajiib shahr hai hamdam kahan adu bhi nahin
Leave a Reply