rutba-e-dard ko jab apna hunar pahunchega
ham-nashin zabt-e-suḳhan ka bhi asar pahunchega
be-sadarat se aajiz hai mira dast-e-junun
koi din ta-ba-gareban-e-sahar pahunchega
khinch ke rah mujh se magar zabt ki talqin na kar
ab miri aah se tujh ko na zarar pahunchega
baton baton men sab ahval-e-juda.i mat puchh
kuchh kahunga to tire dil pe asar pahunchega
ranj uThate hain mire zabt-e-fughan se ham-sa.e
le ke tum tak koi marne ki ḳhabar pahunchega
mere marne se gham-e-ishq na mar ja.ega
mujh ko chhoḌega to gham-ḳhvar ke ghar pahunchega
apne gesu to sambhalo ki khule jaate hain
varna ilzam mire shauq ke sar pahunchega
tum ko jiina hai to kuchh aib bhi lazim hain ‘shahab’
zindagi ko to na faizan-e-hunar pahunchega
Leave a Reply