qurbaten na ban paa.e fasle simaT kar bhi
ham ki ajnabi Thahre aap se lipaT kar bhi
hadson ne har surat apni zad men rakhna tha
ham ne chal ke dekha hai raste se haT kar bhi
agahi ki manzil se lauT jaa.en ham kaise
us jagah nahin jaa.ez dekhna palaT kar bhi
ham ne laakh samjhaya dil magar nahin maana
mutma.in sa lagta hai kirchiyon men baT kar bhi
dasht-e-dil se jo uTTha ho ke surat-e-shabnam
rah gaya hai palkon par vo ghubar chhaT kar bhi
pattharon ke tufan men dil-numa gharondon ne
aazma liya aḳhir ḳhud ko aaj DaT kar bhi
da.eron ke raahi the manzilen kahan miltin
be-murad hain paanv gard-e-rah se aT kar bhi
Leave a Reply