Dusri Baaton Mein Hum Ko Ho Gaya ghaTa Bahut

dūsrī bātoñ meñ ham ko ho gayā ghāTā bahut

varna fikr-e-sher ko do vaqt kā aaTā bahut

kā.enāt aur zaat meñ kuchh chal rahī hai aaj kal

jab se andar shor hai bāhar hai sannāTā bahut

aarzū kā shor barpā hijr kī rātoñ meñ thā

vasl kī shab to huā jaatā hai sannāTā bahut

ham se to ik sher sun kar falsafī chup ho gayā

lekin us ne be-zabāñ naqqād ko chāTā bahut

dil kī bāteñ dūsroñ se mat kaho luT jāoge

aaj kal iz.hār ke dhandhe meñ hai ghāTā bahut

Leave a Comment