dusri baton men ham ko ho gaya ghaTa bahut
varna fikr-e-sher ko do vaqt ka aaTa bahut
ka.enat aur zaat men kuchh chal rahi hai aaj kal
jab se andar shor hai bahar hai sannaTa bahut
aarzu ka shor barpa hijr ki raton men tha
vasl ki shab to hua jaata hai sannaTa bahut
ham se to ik sher sun kar falsafi chup ho gaya
lekin us ne be-zaban naqqad ko chaTa bahut
dil ki baten dusron se mat kaho luT jaoge
aaj kal iz.har ke dhandhe men hai ghaTa bahut
Leave a Reply