Wo Kya Maslahat Thi

main aghaz-e-hasti se havva ki surat

huun aadam ki khvahish ka ik shakhsana

zamin ko basane ka bas ik bahana!

main roz-e-abad nekiyon ka sila huun

na jaane main kya huun

gila khaliq-e-kul se kaise karun main

usi ki raza huun

ye hai fakhr-e-adam

ki bas ibn-e-adam

amin-e-khuda hai qarin-e-khuda hai

miri hasti kya hai

faqat vasta hai!

ye taslim hai

har sahife men

main abida momina saliha thi

magar jab farishton ne aadam ko sajda kiya tha

to havva kahan thi

main ruhon ke iqrar ke vaqt

jaane kahan kaun si saf men thi

ya nahin thii?

agar thi to iqrar bhi to kiya tha

adam men agar ruuh khud-muktafi thi

to phir khaliq-e-kun-fakan ki vo kya maslahat thi

ki main dusri thi!!

Leave a Comment