Na Jaane Kab Se Main Gard-E-Safar Ki Qaid Mein Tha

Raunaq Raza

na jaane kab se main gard-e-safar ki qaid men tha

ki sang-e-mil tha aur rah-guzar ki qaid men tha

dikha.i deta tha muḳhtar dast-o-bazu se

magar vo shaḳhs kisi be-hunar ki qaid men tha

main ḳhvab ḳhvab tha har jashn-e-arzu ka asiir

khuli jo aankh to apne hi ghar ki qaid men tha

khuli faza.en milin jab to ai hava-e-chaman

main be-baza.ati-e-bal-o-par ki qaid men tha

main ḳhush huun yuun ki abhi tak tiri nazar men nahin

vo ashk-e-ḳhun jo miri chashm-e-tar ki qaid men tha

na kar saka kisi manzil ka ehtiram ki main

junun-e-shauq ka maara safar ki qaid men tha

main uḌ raha tha fazaon ki vus.aton men magar

mira vajud abhi bam-o-dar ki qaid men tha

kiya tha raat tasavvur men jis ne qasd-e-farar

vo sub.h pa-ba-girafta sahar ki qaid men tha