mera pyaar
us basti ke naam
jahan mire bachpan ki nannhi-munni yaden soti hain
jahan miri maasum tamannaon ne gharaunde khinche the
mera pyaar
us thande gahre nilam talab ke naam
jis ki ujli mitti mire khilaunon ke kaam aati thi
mera pyaar
us ghar ke naam
jis ki sabz munderon par
mere haath ki rangi hui gaurayya ab bhi chahakti hogi
jis ke taaq men meri nannhi gudiya ab bhi soti hogi
mera rasta takti hogi chupke chupke roti hogi
mera pyaar
us khet aur us khaliyan ke naam
jahan men chandni raton ko
aksar ankh-micholi khela karti thi
mera pyaar
un ujde hue baghat ke naam
jahan banafsha rang shagufon aur kusum ke phulon men
main pahron dola karti thi
par phailati cham-cham karti titriyon par marti thi
un ka taaqub karti thi
mera pyaar
biite hue lamhat ke naam
un ujde baghat ke naam
un suune khandarat ke naam
jo mere purkhon ki ana ka madfan hain
Leave a Reply