saqi-o-vaiz men zid hai bada-kash chakkar men hai
tu ba-lab pur aur lab duuba hua saghar men hai
rok le ai zabt jo aansu ki chashm-e-tar men hai
kuchh nahin bigḌa hai ab tak ghar ki daulat ghar men hai
dab gaya tha mere marne se jo ai mahshar-ḳhiram
kya vahi ḳhvabida-fitna surat-e-mahshar men hai
jis ko tu chahe jila de jis ko chahe maar de
vo bhi teri baat men ye bhi tiri Thokar men hai
dil ke miT jaane se josh-e-ishq ghaT sakta hai kya
dil se kya matlab ki ye sauda to mere sar men hai
manta hai astan ko tere ka.aba aur kaun
ye hamara hi nishan-e-sajda sang-e-dar men hai
‘ahsan’-e-avara-qismat ki na puchho gardishen
apne ghar baiTha hua taqdir ke chakkar men hai
Leave a Reply