darun-e-ḳhvab naya ik jahan nikalta hai
zamin ki tah se koi asman nikalta hai
bhala nazar bhi vo aa.e to kis tarah aa.e
mira sitara pas-e-kahkashan nikalta hai
hava-e-shauq ye manzil se ja ke kah dena
zara si der hai bas karvan nikalta hai
miri zamin pe suraj ba-vaqt-e-sub.h o masa
nikal to aata hai lekin kahan nikalta hai
ye jis vajud pe tum naaz kar rahe ho bahut
yahi vajud bahut ra.egan nikalta hai
maqam-e-vasl ik aisa maqam hai ki jahan
yaqin karte hain jis par guman nikalta hai
badan ko chhoḌ hi jaana hai ruuh ne ‘azar’
har ik charagh se aḳhir dhuan nikalta hai
Leave a Reply