Zohheb Farooqui Afrang
akela huun magar abad huun main
qafas men hi sahi azad huun main
mujhe dil men liye vo ghumta hai
ki us ki an-kahi fariyad huun main
ye duniya maqtalon se kam kahan hai
sabhi ke qatl se nashad huun main
mire siine pe kis ke naqsh-e-pa hain
ye kis ki zaat se barbad huun main
zamana shauq se sunta hai mujh ko
zamane se juḌi rudad huun main
qatar-e-marg men huun sochta huun
ki kis se pahle kis ke baad huun main
Leave a Reply