Kuchh Tabiat Aaj-Kal Pata Hun Ghabrai Hui

kuchh tabiat aj-kal paata huun ghabrai hui

shahr bhar men hai udasi har taraf chhai hui

hae-re gharat-gar-e-sabr-o-shakebai hui

vo tiri tirchhi nazar vo aankh sharmai hui

ai saba chalti hai kyuun is darja itrai hui

kya nahin hai tu vahi us gul ki thukrai hui

vasl men achchhi tarah jab bada-paimai hui

ud gai kafur ban ban kar haya aai hui

shab ko jab abru-o-mizhgan ki saf-arai hui

shokhiyon men dab gai sharm-o-haya aai hui

haae meri be-qarari aur un ka iztirab

aur chalte vaqt ki baten vo ghabrai hui

qabr tak pahuncha gae saare aziz-o-aqriba

aage aage phir rafiq-e-rah tanhai hui

haan tumhin par jaan deta huun tumhin par huun nisar

haan tumhin par hai tabiat tuut kar aai hui

tukde tukde hain jigar ke shisha-e-dil chur-chur

ye qayamat hai tumhari chaal ki Dhaai hui

jis men taqat hai na harakat hai na khvahish hai na jaan

dil nahin ik laash hai siine men dafnai hui

baithte hi baithte mahfil men be-khud ho gaya

dekhte hi dekhte rukhsat tavanai hui

khuub rone do ki ye roke se ruk sakta nahin

mere dil par hai abhi gham ki ghata chhai hui

abdida ho ke vo aapas men kahna alvidaa

us ki kam meri siva avaz bharrai hui

minnaten karta huun dar-guzro khudara bakhsh do

ab to nadani hui ya mujh se danai hui

shikva-e-vaada-khilafi ka mila achchha javab

peshgi rakkhi thi ik ummid bar aai hui

huur par meri tabiat aae kya maqdur hai

tauba tauba ye bhi teri tarah harjai hui

khud hi socho dekhne valon ka is men kya qusur

jab tamasha tum hue khilqat tamashai hui

rote rote thahr jaata huun tiri sar ki qasam

yaad aa jaati hai jab vo baat samjhai hui

de ke dil ghusse men vapas un ko pachhtana pada

kya raqam jaati rahi hai haath se aai hui

khush-nasibi us jagah ki tu jahan rakkhe qadam

rail bhi phirti hai station par itrai hui

jab kaha us ne ki marta huun to kosa is tarah

tujh ko aae ya-ilahi ghair ki aai hui

rabt badhne par khula karta hai kuchh achchha bura

is se kiya hota hai gar rasmi shanasai hui

ishq-bazi aur shai hai fisq hai kuchh aur chiiz

nek-nami ko na kah ‘parvin’ ki rusvai hui

Leave a Comment