adeel-zaidi

Daraegi Bhala Kya Teri Gardish Aasman Mujhko

Daraegi bhala kya teri gardish asman mujh ko

mila rab se dua-e-fatima ka saeban mujh ko

chali hai chhod kar tu kyuun bahar-e-gulistan mujh ko

khuda jaane kahan le jaae ab bad-e-khizan mujh ko

main shukr-e-rab ka qaail huun hava kaisi hi chalti ho

pata asaniyon ka de gaiin hain sakhtiyan mujh ko

jala dunga husul-e-manzil-e-maqsud ki khatir

jalani pad gaiin gar saari apni kashtiyan mujh ko

na sham-e-anjuman men huun na parvanon ka mela hai

kahan tha main kahan le aai hai umr-e-ravan mujh ko

suna hai sab bhula baithe ‘adil’-e-dil-shikasta ko

na jaane aa rahi hain shaam se kyuun hichkiyan mujh ko

More Poems

Leave a Comment