yaqin-e-husn liye rang-e-e’tibar liye
ḳhizan ne aaj baharon ke ruup dhaar liye
hayat jin ke tasavvur se kaanp uThti hai
na jaane ham ne vo din kis tarah guzar liye
tire baghair magar zindagi men chain kahan
agarche gesu-e-halat bhi sanvar liye
maqam-e-dar se aage ḳhabar nahin kya hai
pahunch ga.e hain yahan tak to un ka pyaar liye
nigah-e-shauq chaman men ho kaise asuda
har ek phuul hai daman men apne ḳhaar liye
tabahiyon ke siva kuchh nahin mohabbat men
ḳhiza.en aati hain hamrah ye bahar liye
kisi ki ek nigah-e-karam ki hasrat men
ḳhud apne dil pe hazaron sitam guzar liye
hai un ki bazm haqiqat men bazm-e-aish-o-nashat
vahan na jaa.e koi tab.a-e-sogvar liye
na ab bhi jhuum uThe zindagi to kya kahiye
uThi to hai vo nazar ruh-e-sad-ḳhumar liye
‘ḳhalish’ kahan hai jo dair-o-haram men DhunDte ho
use zamana hua rah-e-ku-e-yar liye
Leave a Reply