Bedam Shah Warsi

Agar Kaba Ka Rukh Bhi Jaanib-e-Mai-Khana Ho Jae

agar kaaba ka rukh bhi janib-e-mai-khana ho jaae

to phir sajda miri har laghzish-e-mastana ho jaae

vahi dil hai jo husn-o-ishq ka kashana ho jaae

vo sar hai jo kisi ki tegh ka nazrana ho jaae

ye achchhi parda-dari hai ye achchhi razdari hai

ki jo aae tumhari bazm men divana ho jaae

mira sar kat ke maqtal men gire qatil ke qadmon par

dam-e-akhir ada yuun sajda-e-shukrana ho jaae

tiri sarkar men laaya huun Daali hasrat-e-dil ki

ajab kya hai mira manzur ye nazrana ho jaae

shab-e-furqat ka jab kuchh tuul kam hona nahin mumkin

to meri zindagi ka mukhtasar afsana ho jaae

vo sajde jin se barson ham ne kaaba ko sajaya hai

jo but-khane ko mil jaaen to phir but-khana ho jaae

kisi ki zulf bikhre aur bikhar kar dosh par aae

dil-e-sad-chak uljhe aur ulajh kar shana ho jaae

yahan hona na hona hai na hona ain hona hai

jise hona ho kuchh khak-e-dar-e-janana ho jaae

sahr tak sab ka hai anjam jal kar khaak ho jaana

bane mahfil men koi shama ya parvana ho jaae

vo mai de de jo pahle shibli-o-mansur ko di thi

to ‘bedam’ bhi nisar-e-murshid-e-mai-khana ho jaae

More Poems

Leave a Comment