Noor Bijnauri
chamakne laga hai tira gham bahut
diye ho chale ab to maddham bahut
ghaTaon men tufan ke asar hain
tiri zulf hai aaj barham bahut
yahan lahlaha.e hain ashkon men baagh
na itra.e phulon pe shabnam bahut
ye vo daur hai jis ka darman nahin
ye vo raaz hai jis ke mahram bahut
ye daman-e-vahshat ki kuchh dhajjiyan
bana.enge log in se parcham bahut
gada-e-mohabbat ki ḳhuddariyan
mile raah men ḳhusrav-o-jam bahut
sulagti rahi raat bhar chandni
shab-e-hijr thi raushni kam bahut
na ja.egi dil se kabhi aarzu
ye buniyad hai ah-e-mohkam bahut
Leave a Reply