Salim Shuja Ansari
kabhi mili hai jo fursat to ye hisab kiya
savab kitne kiye kitna irtikab kiya
hamesha apne amal ka ḳhud ehtisab kiya
ḳhud apne aap ko aise bhi be-naqab kiya
tamam umr bhaTakte rahe gumanon men
vo shai mili hi nahin jis ka intiḳhab kiya
daraz kar na sake phir bhi kasa-e-ghairat
tarah tarah se tabi.at ne be-hijab kiya
kabhi to zabt ne dariya ko kar diya sahra
kabhi junun ne bhi sahra ko aab aab kiya
alag na ho saka dil yad-e-raftagan se kabhi
tire ḳhayal se har-chand ijtinab kiya
ye zindagi hamen kaise muaaf kar deti
vo vaqt vaqt tha ham ne jise ḳharab kiya
javab de ga.iin saari zihanaten ‘salim’
kisi saval ne ta-umr la-javab kiya
Leave a Reply