Poet
afat-e-jan us pari se dil lagana ho gaya
us ko kya chaha ki ik dushman zamana ho gaya
paanv vo kab aate the ab paanv men mehndi lagi
ye to ab un ke liye ḳhasa bahana ho gaya
dekh lenge us ke darban ko bhi ab to kya kahen
gar kisi taqrib us kuche men jaana ho gaya
dil ko paaya ham ne siine men taḌapte loTte
gosh-zad jab apne sher-e-ashiqana ho gaya
kya karega ḳhuld ko le kar vo batla to sahi
kucha-e-saffak men jis ka Thikana ho gaya
ḳhirman-e-tab-o-tavan ke vaste ai ham-nashin
ghairat-e-sad-barq us ka muskurana ho gaya
koh-e-gham tere mariz-e-hijr ne sar par dhara
na-tavan tera yahan tak to tavana ho gaya
yaad men us zulf-e-mushkin ki shab-e-furqat men ‘aish’
jo gira aansu ka qatra sang-dana ho gaya
Leave a Reply