phaila hua hai baagh men har samt nur-e-subh
bulbul ke chahchahon se hai zahir surur-e-subh
baithe ho tum jo chehre se ulte naqab ko
phaila hua hai chaar taraf shab ko nur-e-subh
bad-qismaton ko gar ho mayassar shab-e-visal
suraj ghurub hote hi zahir ho nur-e-subh
pau phatte hi riyaz-e-jahan khuld ban gaya
ghilman-e-mahr saath liye aai hur-e-subh
murgh-e-sahar adu na moazzin ki kuchh khata
‘parvin’ shab-e-visal men sab hai futur-e-subh
Leave a Reply